打橫嚟講：食環署叫雞免費
青樓女子街邊搵客，恩客可以「出手」先驗真假，再作定奪。還以為只係花街柳巷奇技淫巧，估唔到公務員都好呢味！
事緣係食環署職員放蛇查豪宅私房菜，食完二千幾蚊晚膳，飲飽食醉啦，先打畀伙記上門做嘢。
嘩，爽歪歪！海關派員掃毒，係咪可以先試食後檢控？差佬放蛇掃黃，又可不可以「試食」呢？如果可以，咁就真係「美食特警」喇！我認為，呢件事一定要載入警察招聘廣告，激發市民服務大眾的赤子之心，相信應徵人數將會激增，以後形象廣告都唔使賣，可能還有督察自願降級做PC仔添！
其實！同類事件早有前科，不過係反面例子。貪曾當道期間，廉署淪為「廉政私處」，搞到該處女臥底執法時相當老尷，原因自然係……覺得有愧於心囉！可見放蛇內容十分影響員工士氣。所以！重申一次，招聘廣告要列明放蛇着數！
而這種天大的好事，內地日日上演。
你大模廝樣，走入一間日本餐廳，叫到一枱都係，不過弱水三千，只取一瓢飲。然後你聽到店外有反日示威的動靜了，就戴上「保釣紅頭巾」，反枱大喝：「釣魚島是中國領土！」揚長而去之前，記得打爛幾隻杯碟。這樣，你就是一個稱職的愛國臥底！
香港人和平理性不激進，淨識絕食抗議，沒有國內同胞這種福分。都係應徵食環署，上豪宅食私房菜，免費叫隻肥西老母雞，仲好啦！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
Search